IT ક્ષેત્રે ચાલુ વર્ષે નોકરીની 1.20 લાખ તક સર્જાશે..!!

નવી દિલ્હી :  

કેમ્પસ હાયરિંગના ઘટતાં પ્રભાવ છતાં દેશના IT & ITeS ક્ષેત્રમાં ચાલુ વર્ષે નોકરીની 1.20 લાખ તક સર્જાવાની શક્યતા હોવાનું નિષ્ણાતોએ જણાવ્યું હતું .

પશ્ચિમના અર્થતંત્ર મંદીનો સામનો કરી રહ્યા હોવાથી કેમ્પસ હાયરિંગમાં ઘટાડો જોવા મળી રહ્યો છે તેથી આ વર્ષે મોટા ભાગની ભરતી ખુલ્લા માર્કેટમાંથી થશે .

ગય વર્ષે કેમ્પસ હાયરિંગનું પ્રમાણ ઘટ્યું હતું , આ વખતે પણ એવી જ સ્થિતિ છે . ચાલુ વર્ષે આ ક્ષેત્રે નોકરીની 1,20,000 જગ્યાઓ સર્જાવાનો અમારો અંદાજ છે , તેમ ટેલેન્ટ એસેસમેન્ટ કંપની મેરિટ ટ્રેડના ઈનોવેશન અને કોર્પોરેટ બિઝનેસના વડા રાજીવ મેનને જણાવ્યું હતું .

નાસકોમના અંદાજ પ્રમાણે ચાલુ વર્ષે IT સેક્ટર 12 થી 14 ટકાના દરે વિકાસ સાધે તેવી શક્યતા છે .

વર્ષો સુધી IT કંપનીઓ ભરતી માટે કેમ્પસ હાયરિંગ પર મદાર રાખતી હતી . જોકે , 2008 બાદ બદલાયેલી આર્થિક પરિસ્થિતિમાં આ ટ્રેન્ડ બદલાઈ રહ્યો છે અને તેનાથી કેમ્પસમાંથી હાયરિંગ પર અસર જોવા મળી હતી .

ગત વર્ષે 1.8 લાખ ગ્રેજ્યુએટની કેમ્પસમાંથી IT સેક્ટરમાં સીધી ભરતી થઈ હતી જે પ્રમાણ આ વર્ષે 30 ટકા ઘટવાની સંભાવના છે .

બદલાતી આર્થિક પરિસ્થિતિને કારણે કેમ્પસમાંથી સીધી ભરતીનું પ્રમાણ ઘટી રહ્યું છે . બિઝનેસની માંગમાં સાતત્યના અભાવે એન્ટ્રી લેવલની ભરતી પર અસર જોવા મળી છે .

આ નવા ટ્રેન્ડ અંગે બોલતાં ગ્લોબલ હન્ટના એમડી સુનિલ ગોયલે જણાવ્યું હતું કે , હાલમાં સ્થિતિ એવી છે કે નીચા ભાવે અનુભવી લોકો ઉપલબ્ધ હોવાથી કેમ્પસમાંથી સીધી ભરતી કરવાનું ઘટી રહ્યું છે . આ સ્થિતિમાં કંપનીઓ પણ સીધી માર્કેટમાંથી ભરતી કરવાનું પસંદ કરી રહી છે .

2005 માં IT ક્ષેત્રે કેમ્પસમાંથી 3,65,000 સ્નાતકોની સીધી ભરતી કરવામાં આવી હતી પણ , તે પ્રમાણે 2012 માં ઘટીને 1,30,000 થઈ ગયું હતું .